掟飛鏢呢種玩意，幾乎每間酒吧都會有咁滯，以往只會見到男士霸住部飛鏢機，但家吓情況就唔同，事關愈嚟愈多女性鍾意呢種玩意，好似早前喺老尖遇上嘅阿螢同阿蚊，同樣係百分百飛鏢迷，技術更係有番咁上下，佢哋誇口話唔少男士都唔係佢哋嘅對手添！
大顯身手
呢次介紹嘅「Single Club」，開設於山林道一幢商業大廈內，當晚嚟到時，發現場內人山人海，座無虛席，喺家吓經濟麻麻嘅情況下都能夠咁旺場，令娟娟深信酒吧業仍有希望。講番呢間酒吧，環境舒服又企理，VIP房、卡拉OK、飛鏢機等基本設備都齊晒。
採訪期間，發現喺酒吧嘅左面位置逼滿晒人，走埋去八卦吓，原來有班客人正進行一場模擬飛鏢比賽。老闆表示，呢間酒吧不嬲都係鏢迷集中地，為咗滿足客人需要，店方更不時舉辦飛鏢比賽，讓大家有機會大顯身手。
索女出沒
期間遇上靚女阿螢同阿蚊，原來佢哋都係呢度嘅常客，更係飛鏢迷，閒時最鍾意嚟呢度飲番杯，以及練習一下，間中仲同其他客人切磋技術。雖然兩位靚女嘅鏢齡只有半年，但睇過佢哋掟鏢之後，實在可以話比唔少男士仲犀利，唔知大家有冇興趣同佢哋比賽吓咁呢？
酒吧小資訊
九點前入座$128半打，九點後入座$210半打；逢星期五、六有任飲之夜，男士$250，女士$200。此外，二月中會舉辦飛鏢比賽，有興趣嘅朋友記得留意喇！
撰文/攝影：娟娟