問：我同成班老友喺內地卡拉OK唱歌，點知有個食飯盒嘅朋友，竟然喺現場同條女嘈起嚟，最後仲大打出手，打爛咗支咪，同埋幾隻杯、酒樽，部分人負責拉走佢哋，我就留低埋單，點知打爛嘅嘢，全部都同我計，要畀多成千蚊呀？
答：所以乜都好，真係唔好喺啲夜場搞事，特別係啲大場，事關間房裏面，乜嘢都有個價，例如一隻酒杯值幾多錢？一支咪又值幾多錢？甚至啤酒樽都有價，全部有數，如果有人喺度生事，整爛咗佢哋嘅物品，佢哋就會笑笑口咁同你逐樣計數。
事關一隻酒杯，喺巿場買，最多十蚊，佢可以夠膽收你九十蚊隻，一支無線咪，羅湖買都係一百蚊，但佢就收你七百，連幾毫子嘅啤酒樽，都收你幾蚊個，另外有啲夜場仲會收清潔費，有啲朋友生日蛋糕戰之後就知米貴，最少兩百，最多五百蚊。
如果爛咗梳化、雲石枱、電視音響等，更係開天殺價，所以真係咪制，要嘈要打交都行遠啲，發脾氣要掟嘢，最好掟自己部電話，掟其他怕你消費唔起呀！
撰文：小德