體質虛寒

引起男士性功能勃起障礙嘅原因好多，最新嘅觀點指出，就係寒性體質嘅男人，特別容易引起性功能勃起障礙，因為佢哋最主要就係心血管功能都會很弱，血液流通不暢，所以身體時寒時冷，其他特徵就係喜歡食熱嘢嚟保持體溫，體力方面亦會下降，做小小嘢就會乏力兼周身痠痛，手腳方面就容易冰冷，嚴重更有麻痹嘅感覺，最犀利係瞓八個鐘都話唔夠。

有以上病徵嘅朋友就要留意，北京中醫藥大學張牧川博士指出，心血管系統功能減弱，心臟泵血量就會減少，好多微細血管供血就會唔到，所以手腳會出現冰冷，此外血管容易堵塞，愈微細嘅血管就會愈先出現問題，而陽痿就係因此而產生。

採用熱敷

要對付呢種體質，就要加強心血管嘅運作，除咗服藥之外，還要多做運動，加強心血管嘅訓練，但邊啲運動至適合，就要請教醫生，此外，張博士仲話可以用中醫學常用嘅「熱敷」，以改善血管循環，消除組織間水腫，加速新陳代謝。

而最好嘅「熱敷」就係用日常用到嘅熱水袋或者熱毛巾，放置喺小腹部位。即係肚臍至陰毛嘅位置，每晚熱敷十五分鐘，就會有明顯嘅效果，因為熱水袋嘅熱力，能有效改善供應生殖器嘅血管同血液循環。至於小腹深處，更係人體八脈中任脈、沖脈、督脈嘅起源之處，男性嘅性功能與呢三條脈嘅血氣通暢，有着莫大嘅關係，有以上徵狀嘅朋友，不妨試吓。

撰文：小德