解碼睇節目

要睇外國電視節目，大家可以喺網上下載，但想原汁原味啲，大家就可以用衞星接收器，接收衞星電視節目，以前衞星接收器係高科技產品，買一台要幾萬蚊，而且體積好大，屋企冇個大天台或者大空地，都放唔落個衞星天線，但家陣科技一日千里，只要去啲電器城或者電腦商場轉個圈，都唔難買到衞星接收器，而且價錢仲由幾百蚊至千多元就有交易，平到你唔信。

而且體積細咗好多，一部電腦咁上下大細，放喺屋企露台都冇問題，加上使用方便，一買一安就可以接收到好多外國嘅電視頻道，但家陣好多衞星頻道都會「加密」，要再入會畀月費至有得睇，但如果唔想畀錢，花幾百蚊買部解碼器一樣可以。

完全冇監管

就好似國外嘅成人頻道，大部分都加密咗，要入會畀月費至有得睇，但聰明嘅中國人，要解你衞星嘅密碼有幾困難，於是買衞星接收器加埋解碼器，一套咁買，就可睇到好多節目，而據講有色情成分嘅電視頻道，就有九個咁多，真係有排你睇。

而購買呢啲衞星接收器嘅朋友，大多數都係年輕人，可能要有少少電腦知識至可以使用到有關設備，所以當中宅男佔咗大部分，佢哋成日匿喺屋企，唔係打電腦就睇成人台，好多專家都擔心佢哋，人格心理將來會發展成點，就算唔係宅男，普通男士睇咁多成人節目，對身心都冇益處，最弊有關方面完全監管唔到，咁至最令人擔心，希望大家咪受色情節目荼毒心靈就好啦！

撰文：小德