撰文：小德

風寒引起肺炎

古時點解要人喺冬天禁慾呢？主要原因，並唔係性交本身有乜嘢傷害，而係性交過程誘發出嚟嘅問題，例如天寒地凍，夫妻進行性行為，難免需要寬衣解帶，呢個時候極容易受風邪感染，引起上呼吸道嘅毛病，加上冬天身體較難發汗，所以極容易積存體裏，時間一長，到發病時就十分難醫治，好多人會引發肺炎，嚴重更會失掉性命，所以古人勸喻大家冬天最好禁慾。

此外，天寒地凍，沖涼都會少啲，特別喺性行為前後，大家亦懶得去清洗，久而久之，極容易引起婦科病，嚴重嘅更會出現炎症，丈夫不察覺繼續進行性行為，亦會遭受細菌感染，古時一到春天，好多人去搵醫生治「春病」，就係咁嘅原因。

小心血氣不足

另一方面，冬天天氣轉變，人嘅血氣都會減弱，如果本身有潛藏嘅疾病，極有可能喺呢個時候被誘發出嚟，如果好好保養身體，保持血氣充足，應該都冇問題，但如果喺冬天仲過度進行性行為，虛耗元氣，當血氣出現不足時，疾病就會隨之而嚟。

現代人生活環境同古人明顯唔同，喺冬天進行性行為，只要小心進行，亦未嘗不可，例如家居只要保持適當溫度，就可免被傷風感染；事前事後保持個人衞生，就會避免「春病」嘅出現；而定期進行身體檢查，知道自己嘅身體情況，就不怕突發性病變嘅出現，如果身體本身有問題，亦可查詢醫生，喺冬天能否進行性行為，只要做足安全措施，一年四季性交都冇問題啦！