早幾日約咗班朋友去蒲吧，娟娟例牌喺老尖集合，至於地點就選擇喺棉登徑一帶，事關嗰區有唔少斯文場，環境舒服又企理，絕對可以靜靜哋飲番杯之餘，又唔需要擔心受到滋擾，女士玩得開心又放心。除此之外，更可以隨時欣賞精彩表演，好似呢次就見識過一位Bartender嘅拋火樽技術，真係好犀利架！
火光熊熊
話說當晚喺「Living」飲嘢，呢度屬於清吧，環境乾淨企理，牆身嘅燈箱裝飾，令酒吧變得更有格調，難怪吸引唔少白領人士嚟幫襯喇！同朋友吹水時，佢話吧頭裏面嗰個型男Bartender拋樽好掂，問娟娟有冇興趣睇吓，心諗冇乜出奇啫？突然間，見到吧頭位火光熊熊，難道火燭？正當娟娟想慘叫之際，睇清楚啲，原來只係Bartender正玩緊「拋火樽」！
拍案叫絕
經了解後，知道呢位Bartender叫Chris，喺酒吧工作咗五年多，見佢將沾有烈酒嘅紙張塞入一個長頸形嘅酒樽，點着火之後即開始玩花式，非常厲害！唔少客人都畀佢嘅精彩表演深深吸引，大家都睇到拍案叫絕！事後唔少蒲友都紛紛上前大讚佢厲害。
問番Chris先知，原來佢嘅拋樽功夫係自學番嚟，大概學咗三年多，平時多數靠上網睇片或睇碟，然後不斷練習，終於練得一身好「武功」。至於咁危險嘅拋火樽玩意，正是佢嘅強項之一，仲話知道娟娟嚟玩，所以特別表演畀我睇，認真有「飛士」！
雖然呢招拋火樽咁「猛」，但娟娟亦都要勸喻大家咪亂試，燒親就唔好啦！
撰文、攝影：娟娟