問：我最近喺長安同個技師沉咗船，雙雙築咗個小愛巢，過二人世界，我每月仲畀四千蚊佢，佢家陣唔再返工，如果我放假，佢就會陪足我成日，但如果我唔喺度，佢就日日夜夜咁打麻雀，一個月唔夠就話啲錢使晒，究竟內地麻雀打幾大嘅呢？
答：內地家陣流行嘅麻雀，一般係打十蚊廿蚊，即係邊一家自摸，其餘三家都要畀廿蚊贏家，有啲會打埋「打出」，但比較少人打，因為打出放炮嗰一家只需畀十蚊贏家，所以就算有人打，但人人都會等自摸，因為價錢係十蚊同六十蚊嘅分別。
呢種麻雀最特別就係有「槓」，無論邊一家有明槓、暗槓、包槓都有錢收，自己摸番嚟嘅叫暗槓，等同自摸，其餘三家終局後各畀廿蚊，碰出後摸埋第四隻返嚟叫做明槓，每家要畀十蚊，至於包槓，就係邊個打出畀人開槓，就要一個人畀三十蚊。所以話就話一鋪牌廿蚊上落，但如果計埋槓，隨時變多幾倍，冇一千幾百喺身，都冇資格落場，而啲小姐最常見打嘅係五十一百，但每日上落千零兩千真係閒閒哋，你老哥畀四千蚊家用，夠輸兩三日咋！都係早啲叫佢戒賭或者飛咗佢算啦！
撰文：娟娟