所謂「女多人不怪」，多女性客人嘅酒吧，確實零舍旺場，好似呢次介紹嘅酒吧就係其中一個例子。為咗了解呢間酒吧有乜優點，可以吸引咁多女仔落去玩，小記特別訪問咗幾位客人，發現原因各有不同。
搞活動增競力
呢次嚟到尖沙咀「Cash Club」，發現內裏面積頗大，環境乾淨企理，形形色色嘅霓虹燈令酒吧顯得更有格調，除咗多間VIP房，仲設有多個獨立梳化卡位，為客人提供更充裕嘅私人玩樂空間，另外喺吧頭側邊設有一個小型舞池，仲有現場DJ打碟添！
負責人Ken表示，佢哋嘅客路多數為附近返工嘅白領人士，以女性居多，佢估計受歡迎原因係價錢比其他酒吧平。佢話：「跟早幾年相比，家吓酒吧生意真係差好遠，為咗吸引客人嚟玩，價錢上作調整確實無可厚非。此外，仲要不時舉辦活動，好似逢星期三、日舉行『Lady's Night』，又或者喺呢個月逢星期五舉辦大話骰比賽等，贏咗仲可以獲得禮物或現金獎。老實講，搞咁多活動，無非為咗增加大家對酒吧嘅新鮮感，同時亦提升競爭力。」
至緊要抵玩
淨係負責人講，似乎唔夠中肯，所以娟娟再訪問咗幾個自稱係酒吧常客嘅靚女，結果發現佢哋對選擇酒吧方面，離不開「平、靚、正」三個要求。
TT話：「嚟呢間吧玩嘅原因只得一個，就係冇咁多閒雜人等，你知啦！有啲酒吧好多麻煩人，真係玩都玩得唔安樂，呢度就唔同，客人都玩得好斯文，感覺上舒服得多。」
程程：「我同TT嘅心態差不多，雖然呢間吧比較多人，但唔算太嘈雜，起碼唔會有人嗌破喉嚨咁猜枚先啦！」
V：「我鍾意呢度有現場DJ打碟，覺得佢技術好掂，音樂好聽，如果有機會跟佢學吓就更好喇！」
寶玲：「作為一個消費者，梗係想搵一間經濟嘅酒吧，呢度價錢大眾化，合乎我要求。」
撰文、攝影：娟娟