遊戲一：「啤牌疊羅漢」

懲罰方法：有啤牌跌落嚟，即罰一杯紅酒。

首先預備空酒樽一個，以及啤牌一副，第一張啤牌放喺樽口位，然後再一張張咁疊上去，但唔可以係同一位置，而要順時針咁放，當啤牌愈放愈多，就會形成「啤牌樹」，由於「啤牌層」重量不平均，所以上面啲啤牌層會好易跌落嚟。

遊戲二：「馬騮仔上樹」

懲罰方法：一隻馬騮仔跌落樹，即罰飲一杯啤酒。

玩法相當簡單，黃色透明玩具樹身，插滿好多竹枝，上面掛咗一啲馬騮仔，當你拔掉竹枝時，馬騮仔自然跌落嚟，好彩嘅話馬騮仔條尾會勾住下面另一竹枝，唔好彩就會跌落嚟，咁就當輸喇！

後記

尋晚落咗尖東嘅Athena22，巧遇三位美少女Hena、Francis同Jenny，行埋去吹水，原來佢哋都係現職辦公室女郎，平時蒲開尖東，尤其係棉登徑一帶酒吧。佢哋話呢兩個小遊戲都好過癮，但建議唔好連續咁玩，事關啤酒、紅酒溝埋，真係飲到你驚驚！

撰文、攝影：娟娟