史Sir話：「估唔到佢嘅作品竟然會出單行本。」朋友回應：「所以無論如何，我今日都要買番本支持吓。」史Sir點頭認同，朋友問：「你鍾意佢乜嘢呀？」史Sir話：「我鍾意佢題材夠大膽，好多題材係一般人點都諗唔到嘅嘢，都畀佢諗得到。」

朋友話：「佢嘅作品真係搞到我晚晚都瞓唔着。」史Sir話：「我都係呀！睇完就會血脈沸騰，好想快啲追埋落去，睇吓個結果係點。」朋友話：「佢作品啲女主角先至厲害，個個都功夫了得，幾本事嘅男人，都可以令佢哋乖乖咁俯首稱臣。」

阿花聽到呢到就問：「佢哋睇乜嘢小說呀？」小娟不屑道：「男人老狗，九成睇啲唔正經嘅書啦！」史Sir繼續：「每次睇到高潮嘅時候，我就最興奮，因為可以幻想自己係故事主角，一同親身感受最後嘅震撼同埋快感。」就喺呢個時候，有水樽掟向史Sir。

各位聰明嘅讀者，大家估唔估到史Sir喜歡嘅係乜嘢小說呢？

1. 艷情小說

2. 四級小說

3. 推理小說

4. 武俠小說

答案：3. 推理小說

解釋：小娟佢哋唔識，皆因呢位係新進女作家，題材方面亦以較新角度出發，史Sir自然睇得開心。至於功夫係指推理能力，書中多數以女性做主角，解決案件時自然表現出推理能力強，解開謎團後令男人俯首稱臣，至於高潮位咪即係揭出真兇嘅一刻囉，大家明白未？

小德