女優工作

藝人行性感會被人揶揄佢哋冇人氣，要賣肉催谷爭收視，但水着女優卻係奉旨行性感，擺性感誘人嘅甫士，相信對佢哋嚟講應該冇難度。不過鈴木妹卻搖頭道：「雖然話我哋賣弄性感係工作嘅一部分，但部分新入行嘅水着女優，卻係要求多多，唔似得我哋咁有專業精神。」

唔通有女優耍大牌，唔肯以性感造型出鏡？小坂妹就話：「唔係話佢哋耍大牌，而係佢哋要求多多，經常反過嚟問攝影師或導演，點解要佢哋着咁性感嘅衫，而甫士較為惹人遐想時，更耍手兼擰頭，非常難服侍。好似我之前同某個女優拍寫真時，對方就投訴泳衣過於暴露而罷拍。查實我同佢件泳衣一樣，又唔見我唔願拍？」

身材火辣

可能佢哋作為新人，驚太快行性感，會失去叫座力呢？鈴木妹笑道：「水着女優嘅工作就係要突出女性嘅魅力，如果覺得行性感會冇咗吸引力嘅話，點解要做水着女優呢？不如話佢哋冇專業精神好過！」

小坂妹認同道：「其實佢哋可以從另一個角度嚟睇呢份工作，就唔會咁多投訴。譬如佢哋可以視穿着性感嘅泳衣，係突出佢哋火辣嘅身材，並趁住青春留下倩影，留待日後懷念之用。明白到寫真唔單止為賺錢，當佢哋影寫真嘅時候，就會更加賣力。」聽到小坂妹咁講，相信佢哋喺拍攝寫真時，都係以呢個作為目的。鈴木妹點頭道：「既然我哋有咁好嘅天賦本錢，又怕乜露多啲肉呢？」

追求者眾

兩位人氣水着女優既有樣貌又有身材，最重要唔怕性感演出，相信追求佢哋嘅人應該唔少。點知小坂妹卻面紅道：「我又唔覺得好多人追我喎！好似我啱啱過去嘅生日咁，只係得成班姊妹同我慶祝，真係可憐！」鈴木妹亦道：「其實我對男友嘅要求唔係高，但唔知點解到依家仲未有男友。」

會唔會係你眼角高，一般嘅男仔睇唔上眼呀？鈴木妹搖頭道：「我覺得男仔只要有成就同溫柔，就已經符合男友嘅條件，但我身邊嘅男士，卻唔發覺有呢項優點，因此到依家仲未有着落。」小坂妹點頭道：「我嘅要求都唔係高，只係想佢能夠成日陪住我啫！」成日陪住你，唔通唔使搵食咩？

玲木茜小檔案

出生日期：1984年4月2日

身　　高：166cm

三　　圍：35、23、32

興　　趣：影相

小坂由佳小檔案

出生日期：1985年6月27日

身　　高：168cm

三　　圍：35、23、33

興　　趣：睇戲

撰文：阿豪