最近羅湖啲夜場玩正經晒，由跳舞嘅舞蹈員，到女侍應，全部都着到密密實實，朋友成哥問過囡囡，點解着到咁密實？囡囡話：「近排有關方面成日嚟查，大場嘅女公關，全部着衫都有規定，但天時暑熱，好多姊妹都着得露一啲，點知就畀人玩，如果多口嘅話，更會畀人拉返去踎幾日添，都咪話唔得人驚！」
所以好多囡囡都情願着到密密實實，免得畀人玩，有人會問，嚴打期間仲有囡囡做三陪咩？深圳有部分細場冇晒囡囡，有啲大場就仲有供應，但坐枱期間一定要冇任何色情成分，巡查時要合作，有證件協助調查，攬頭攬頸當然唔可以啦。女公關方面收斂晒，大家都以為冇事，點知有關人士就將矛頭指向打碟妹同埋吧枱侍應，因為有啲打碟妹同吧枱囡囡，只着迷你裙同小背心返工，就算喺街上，正經人家咁樣着法一樣畀人話過分性感。
正經女仔都畀人咁玩，於是公司下令所有員工都要注重儀容，免得畀人有機可乘，所有員工執企理後，大家都以為冇嘢啦，點知有關人士竟向跳舞女郎埋手，話佢哋上台表演舞蹈，係存心賣弄色情。真係冤枉大老爺，舞蹈員啲衣服，不嬲都係咁嘅樣架啦，咁多年嚟都冇人投訴，但今時今日就畀人話唔好，於是連舞蹈員嘅衣服都要收斂一下，睇嚟只可以跳民族舞啦，所以近排去大場玩，佢哋着到密密實實係有原因嘅，千祈唔好怪啲囡囡呀！
小德