免費入場

要了解靚女喺派對圈子有乜嘢着數？一定搵番呢個圈子嘅代表人物，我哋搵嚟靚女派對搞手莉雅嚟訪問一下？莉雅話：「原本自己嘅志願係做老師，後嚟因為去派對玩太多着數，於是決定肥水不流別人田，索性做埋派對搞手，一於攞晒啲着數。」

莉雅話：「一個派對能否成功，最緊要當然係搞手，但搞手點先至成功，最重要係佢手上有幾多靚女客人喺手，道理好簡單，成功與否視乎口碑。喺同一個派對上，樣子普通嘅囡囡大讚好玩，同一個樣子省鏡嘅囡囡大讚，相差就已經係天壤之別。」

所以一個成功嘅搞手，就要有大批靚女客人喺手，而要留住呢班靚女，就要花點心思，不斷畀着數佢哋就係其中一個最好嘅方法，例如門票可以優先訂購，玩完至畀錢，遇上贊助商要多啲靚女到場嘅話，門票方面仲可以打折扣或者免費送畀佢哋。

酒水任飲

此外，一啲出名打扮性感嘅囡囡，莉雅話仲要特別招呼佢哋：「例如要派司機接送佢哋，出入派對時要走特別通道，如果有包廂，仲要留特別包廂畀佢哋，如果佢哋怕畀人騷擾，我哋仲要派埋私人守衞負責保護佢哋，真係當佢哋係貴賓一樣！」

有冇咁誇張呀？莉雅話：「當然呢啲靚女本身都非富則貴，而且佢哋一出場就艷光四射，當佢哋係明星咁看待都值得嘅！」咁除咗呢啲特別例子外，正常靚女有乜嘢好處呢？莉雅話：「一般都會畀啲印有免排隊嘅門票佢哋，唔使排隊直接入場。」

呢招一來畀佢哋威啲，二來免佢哋排隊時畀人抽水發生不愉快事件，莉雅繼續：「入到場之後，搞手或者佢哋啲助理就會特別照顧班靚女，有房畀房，有靚位畀靚位，唔少得嘅就係派飲品券，一般人得兩張嘅，佢哋就多一倍，唔夠數再畀。」

包識靚仔

咁咪好蝕底？莉雅話：「點會呢？佢哋愈飲得多，就會愈興奮，想現場氣氛高啲，就要佢哋飲多啲，如果贊助商有靚酒嚟，我哋仲會叫啲囡囡去飲靚酒，等佢可以玩得更盡情奔放，但如果有啲一飲醉就發癲嘅，我哋會禁止佢哋飲醉，免得失禮。」

另外，靚女仲可以優先認識DJ、歌手、派對貴賓同埋贊助商負責人等，莉雅話：「呢手絕招，就係等佢哋有意外收穫，派對中有唔少青年才俊出席，我哋就利用呢個賣點吸引佢哋出席，適當時候我哋就會介紹佢哋認識，唔少真係釣到金龜添！」

難怪啲醜女咁妒嫉啦！男人聽見有咁多好處都羨慕死啦！何況大家都係女人，只係一個靚，一個唔夠靚，福利同對待就天壤之別，唔怪得冇着數嘅囡囡忿忿不平，大叫「靚女大晒咩？」但事實話畀你知，呢個世界真係靚女大晒㗎！

撰文：小德