感到自豪

提到偷拍，香港女性都算幾幸福，因為偷拍器材唔容易買到，而且市民亦好有道德，所以偷拍風氣遠遠不及日本咁厲害！因為日本嘅癡漢可謂多不勝數，搞到好多鐵道都要開設女性專用車廂，防止有癡漢乘車廂人多擠迫嘅時候，對女性偷拍，甚至動手滿足手足之慾。

日本水着界嘅極級美女手島優就表示自己驚都未驚過，佢話：「我都聽講過日本有好多癡漢鍾意喺電車玩偷拍，但係我自己就未遇過。不過，就算遇到我都唔會驚，因為我覺得既然自己咁好身材，又驚咩畀佢哋拍呢？而且，每個男人都有自己嘅審美眼光，癡漢當然亦唔會例外，你估佢哋好醜都照拍咩？一旦成為佢哋嘅目標，就表示自己有吸引力，令佢哋唔拍唔得，所以自己應該感到自豪先係！當然，呢種行為絕對唔可取，你哋班男人唔好學呀！買我嘅寫真集咪可以睇晒我呢副極品身材囉！」

增加名氣

日本嘅偷拍風氣有幾勁，單睇癡漢嘅數字其實不能夠作準，反而睇佢哋嘅作品就可以反映到佢哋有幾猖狂，因為好多癡漢都會將其作品放上網公諸同好，甚至有網站專為癡漢而設，搜羅大量偷拍嘅相片又或者係短片，可想而知有幾多女仔受害！

另一位水着折原美紀就話，自己同手島優一樣唔怕班癡漢，美紀話：「啲癡漢嘅行為真係好猖狂㗎！我仲知道佢哋除咗鍾意喺電車偷拍之外，仲鍾意喺女廁裝偷拍鏡頭，真係諗起都覺得變態！所以我就唔會亂咁去公共廁所方便喇！但係，佢哋嘅偷拍行為真係無所不用其極，有時出席公眾場合嘅時候，可能被佢哋嘅鏡頭拍咗都唔知。不過我又唔驚，因為佢哋最多都係拍到我露底。如果佢哋將相片放上網嘅話，我就真係多謝晒佢哋喇！事關我都算薄有名氣，走光相一定多人睇，反而會增加我嘅知名度添！」

咪亂咁嚟

其實，偷拍只係癡漢嘅其中一種變態行為而已，更猖狂嘅癡漢甚至會動手動腳於電車車廂內抽水，唔知咁樣做佢哋又驚唔驚呢？手島優就話：「梗係驚啦！雖然我哋水着女優係靠性感搵食，但係唔代表我哋係蕩女㗎！偷拍我本身可以接受，因為對我嚟講不痛不癢，而且我亦未必會知道，但係若然對我動手抽水，就會搞到我周身唔自在喇！因為我真係唔習慣畀陌生人亂咁嚟，所以萬一有一日真係遇到癡漢郁手郁腳，我一定會大叫，然後摑佢幾巴，再搵人拉佢去警局發落！各位女仔亦應該勇敢啲，真係遇到癡漢博懵，千祈唔好啞忍，一定要企出嚟舉報，因為佢哋搞得一個，自然會搞第二個第三個，受害者就會愈來愈多喇！」

撰文：賢