黑色為主

蒲妹選美、鋼管舞甚或大抽獎，幾乎喺夜場玩爛玩厭，好似呢間夜場咁，早前已搞過現金大抽獎，甚至連續四十八小時通宵跳舞派對，都有唔錯反應，今次夜場玩「黑夜」派對，大家都知道呢種顏色畀人一種神秘感覺，再加上玩意都係貼近「性」，所以就令到唔少好此道嘅蒲友可以盡興一番！

蒲友可以上台同女Dancer一齊玩，呢種活動雖然並唔新鮮，但係節目夠特別嘅話，咁又唔同講法，可以挑起人客條根，令佢哋情緒更高漲，咁就可以令佢哋玩得加倍投入。簡單講係忘我境界，呢個以黑色為主題，同營救美女嘅遊戲，原來可以挑起男士嘅性慾㗎！

投入玩樂

夜場搞節目幾時都要度橋，如果只係求求其其搞個騷出嚟，咁吸引力有幾大？相信大家都估計到。人客之中雖然分好多類，但鍾意玩迷幻，同時帶多少性元素，就可能會令好多蒲友開心，因為好此道者大有人在，其實呢類節目玩意都好普遍，旨在挑起場內人嘅情緒，令佢哋可以快啲投入。

好似呢場騷，在場表演者都着上黑衫黑褲，男女跳舞就可以話指定動作，咁有冇辣身舞？就算有都只係有限度，因為呢個騷唔係賣弄色情，相信令人客最開心嘅，就係呢個節目可以與眾同樂。令大家最開心不過嘅，相信係勇救美女環節，在場有幾位小姐都被鎖上，有興趣玩嘅人客可以走上台揀條鎖匙幫囡囡開鎖，大家估吓有冇人上台？當然係男人都爭住上啦，事關被鎖嘅靚女在場不斷咁發出呻吟聲，希望快啲有人救佢，再加上詭秘音樂，嗰種令人心癢癢嘅氣氛，確實令到唔少人好快進入亢奮狀態！

性癖同好

其實呢類節目，喺夜場受到唔少人歡迎，因為好多人飲咗酒之後，好快就已經進入興奮狀態，而且當中有唔少蒲友都係對滲有性元素嘅玩意十分迷戀，當晚夜場搞呢個節目，其中一位來自西班牙嘅玩家艾爾法，就係一位性癖狂人！「呢度嘅夜場多姿多采，任何類型都有，而呢類節目都好多，因為我喺西班牙嘅夜場節目類型少，所以我就同朋友一齊過嚟玩，但略嫌呢間場玩得唔夠激，如果可以再到肉啲，咁我諗對性癖同好者會開心好多！」

咁呢位蒲友又激得滯嘅！話晒呢度都係夜場，搞乜節目都只可點到即止，如果真係要玩激啲，不如自己約三五知己仲實際啦！

撰文：祖