唔少出嚟做嘢嘅成年人，大家出嚟玩嘅時候都會不約而同有一個共同睇法，就係如果可以的話，都希望能夠返學校，因為成年人都會認為如果可以返到從前，淨係讀書而無任何負擔係最開心嘅，大家認唔認同呢？
最近刮王去過一間的士高，佢哋就搞咗個Back to School之夜，當晚大家只要喜歡的話，大家可以着上以前嘅校服，然後大家齊齊開心跳舞一番。刮王當晚都有在場，見到唔少剛離開學校出嚟做事嘅男女，佢哋齊齊吹水飲酒之時，都會有一個同感，就係認為依家返工嘅日子好難捱，因為佢哋以前認為返學係好辛苦，其實依家出嚟做事之後，就知道當年校園生活係幾咁簡單。
的士高搞手話，佢已經離開咗學校成二十年，最近佢突然間想起以前讀書時期落去的士高玩，就一定會畀人鬧到飛天，所以佢好想破例一次着住校服去跳舞，所以先有咁嘅想法，佢就搵咗一位搞手，呢位竟然係佢剛讀完大學出嚟做事嘅大仔，由佢帶同成班剛投身社會工作嘅同學齊齊玩餐飽，成班後生仔着住校服，齊齊喺的士高內飲番杯跳番場舞，總之就係乜都唔諗，目的就係想輕鬆番一晚。
刮王