女星為咗減肥

我哋搵嚟教過AV女星打泰拳嘅教練哲夫先生，等佢嚟講解一下呢股熱潮，哲夫話：「跟我學過泰拳嘅女星，最少都有十零廿個，當中有過半數係性感偶像，其中有唔少仲係AV女優，咪睇班囡囡雞手鴨腳，但練起拳嚟十分認真，仲幾吃得苦頭添！」

佢哋點解會嚟學打泰拳呢？哲夫話：「由於泰拳嘅運動量十分之大，肢體動作又特別多，所以對纖體減肥好有幫助，我有個例子，有個女星，佢啲拜拜肉同一對甲組腳點整都瘦唔到，於是問我練泰拳之後有冇用，我咪叫佢試一個禮拜囉！」咁最後點呀？哲夫話：「我安排咗個中等運動量嘅訓練畀佢，佢操咗一個星期，馬上冇晒拜拜肉，雙腳肌肉結實晒，變得十分修長，佢開心到不得了，仲馬上介紹咗唔少女星嚟報名學泰拳。」咁除咗修身之後，練泰拳對囡囡仲有乜嘢好處呢？

學員身心健康

哲夫諗咗一諗話：「我哋仲可以豐胸，經過我哋長時間訓練之後，好多女星都話自嘅胸部大咗結實咗。」咁佢哋啲男朋友咪贊不絕口，哲夫話：「佢哋男朋友嘅反應我就唔知道，但有AV女優嘅拍檔，就話佢哋練咗拳之後，胸部手感強咗好多。」

教練愈講愈興奮：「除咗普通強身健體之外，其實練泰拳仲可以減壓同埋令心靈平靜，因為我哋練習時，會播一啲特別嘅音樂，有啲學員話聽咗之後心境會好平靜，心靈會好舒服，所有壓力都可以隨汗水流出，打完拳之後一身鬆晒。」啲女星練拳有一段日子，會唔會上擂台比賽呢？哲夫雙眼放光：「我都有咁嘅打算，但就唔係比賽，而係表演賽，主要係幫助推廣泰拳運動喺日本嘅發展。喺男子比賽時，穿插一兩場由女優負責嘅表演賽，號召力自然大增，觀眾都會多啲捧場。」

打算全球演出

咁到時啲女優會只着運動褲，定係會着比堅尼呢？哲夫話：「只穿短運動褲，上身赤裸咁打拳，就應該唔會。因為我哋主要唔係要賣肉，我哋搵AV女優嚟表演，主要係想借佢哋嘅名氣，吸引多啲觀眾入場啫，但着比堅尼嚟比賽，應該會考慮吓。」

AV女優方面，初步有幾多人有興趣上台比賽呢？哲夫話：「我手上都有幾個，加埋其他師傅，都有十個八個啩，只要再訓練多一段日子，要佢哋打三個回合兩分鐘嘅賽事，應該冇問題。」咁出場費呢？哲夫笑笑口話：「當然比拍一套AV片酬高啦。」

咁好價錢，啲女優咪好好賺，難怪咁多囡囡要學泰拳啦，原來多條出路。而且有老闆仲想將佢哋組起嚟全國表演，反應好嘅話仲全球巡迴演出。嘩！諗起都興奮，一個個性感女郎，身穿比堅尼喺擂台上拳來腳往，肯定好睇啦，囡囡們加油呀！

撰文：小德