唔使錢至會到

我哋搵嚟專替推廣公司搞名媛派對嘅米高，講解一下最近嘅情況，佢話：「家陣啲名媛，一啲都唔似名媛，以前搞呢啲名媛之夜嘅派對，門票唔貴，佢哋都唔會出現，因為怕影衰身份。但家陣啲名媛，唔使錢請佢哋嚟，佢哋都仲要阿吱阿佐。」

原來以前啲名媛出手好闊綽，一次派對使幾千美金都面不改容，反而你話百零蚊張飛，佢哋睬你都傻。但家陣新一代名媛，佢哋專揀啲便宜派對去玩，如果同公關公司相熟，佢哋仲主動要求免入場費添，如果有贊助商，更加會反過嚟搵埋着數。

米高話：「我哋有時都怕咗佢哋，不過有佢哋到場，點都有啲宣傳價值，對於贊助商嚟講，有新聞點都好啲。但呢班名媛嚟到，要招呼佢哋，有時都幾麻煩，由於大家都比較熟，佢哋有時遇到啲唔滿意嘅嘢，就會即時向我哋詐型，仲要我哋即時解決。」

爭取專用廁所

米高話：「有時真係我哋出錯，於是馬上改正，絕對唔係問題，但有時係場地本身，或者係意外出錯，一時三刻改正唔嚟，而且個騷都開始咗，其他人都冇問題，就只有繼續做落去，但呢班大姐，非要你解決個問題不可，有時真係都幾頭痕。」

此外，據米高講佢哋要求多多之後，着數仲要攞盡，例如出入要有車接送，當然唔會要坐普通車，唔係名車都唔坐，另外一定要當佢哋係貴賓（VIP），例如特別出入口、座位等都要註明貴賓專用，有啲煩友連廁所都要註明，認真冇嘢搵嘢嚟做。

咪以為佢哋攞晒着數之後，就會乖乖同你合作，米高話：「佢哋未必會同你合作，有時仲會同你作對，打對台添！例如停音樂開始節目嘅時候，佢哋經常噓得最大聲；司儀講嘢時，佢哋又係最嘈嘅一班；要佢哋玩遊戲，佢哋又會拒絕合作。」

眾女搶一男

佢哋一場嚟到，又會乜都唔玩？米高話：「佢哋唔係唔玩，只係揀嘢嚟玩啫，例如我哋推廣香檳，佢哋就會爭住嚟飲，如果我哋有香檳噴泉，佢哋亦會爭住嚟玩。總之特別嘅嘢，佢哋就會有興趣玩，至於普通嘅遊戲同節目，要佢哋玩都好難。」

除咗特別嘅遊戲之外，佢哋仲會對乜嘢有興趣呢？米高話：「我哋有時會搵啲舞男嚟演出，佢哋就會發晒癲，好似幾十歲人都未見過男人咁樣，除咗表演時爭住同佢哋玩之外，連表演完之後，都爭住要佢哋陪，有時仲幾個女人爭一個男仔添。」

咁最後會點呀？米高話：「舞男見狀會話仲有工作，要求有興趣嘅囡囡留個電話，但佢哋就會冇嚟聲氣，因為之後搵舞男就要使錢，所以只會爭住玩免費舞男，所以話家陣啲名媛，真係一代不如一代。」此風認真不可長，千祈咪吹過嚟香港呀！

撰文：小德