刻意低調

真奇怪，水着妹都算半個藝能人，有機會曝光當然唔會拒絕，有人甚至要自己製造緋聞至可以出鏡，但水着妹佐藤里香就話要刻意低調，究竟佢係咪唔想撈呢？阿妹解釋：「當然唔係啦，我都深明做藝人曝光率嘅重要性，之但係水着妹成千上萬，就算日日曝光，都未必係一件好事！因為觀眾喜歡新鮮感，去到邊都見到你副尊容，睇足一年乜都厭啦！」阿妹你有道理，但做人都要搵食㗎？

「呢層當然啦，所以我刻意於幕前表現低調，積極做好幕後，因為只要少啲曝光，就可令觀眾保持新鮮感，大家就會當我新人咁看待，但要記住，每次出現都絕不能馬虎，要以最佳狀態示人，咁至令觀眾留下深刻印象㗎！」阿妹又講得幾有道理噃！

意志堅定

不過唔好以為刻意低調人人玩得起，確實要好似佐藤里香咁高質素至可以把握得好！事關阿妹嘅身形真係弗到漏，係男人睇見都有幻想，難怪收收埋埋都咁惹火啦！佐藤里香解釋：「呢啲就係台上一分鐘，台下十年功。大家只睇見我索爆嘅一面，其實我背後好辛酸，每日都要節制飲食，又要喪做運動，至有咁嘅身形，假如我意志唔夠堅定，一放鬆就會暴肥，到時觀眾不但唔可憐我，相反仲會嫌棄我添！你話做水着妹幾慘呢！」

食得鹹魚抵得渴啦！不過阿妹你嘅努力一啲都無白費，依家咁多支持者撐，簡直要風得風，即使唔露肉都唔使愁啦！「又唔係咁講，我比一般水着妹少曝光，一定會較蝕底，若然造型唔合觀眾口味的話，咁就好大件事，所以每次事前都要做好準備，調查一下潮流趨勢，咪以為水着妹只要露肉就夠，其實化妝、髮型以及甫士都要兼顧，否則觀眾就會遺忘你！」里香妹道。

另類宣傳

佐藤里香妹有自己嘅遊戲規則，好姊妹多田亞沙美都喺水着界有一定知名度，唔知佢又係咪認同佐藤里香嘅低調玩法呢？

多田亞沙美話：「我絕對認同佐藤里香嘅低調做法，事實上現今水着界，公司為咗搵錢，不斷幫旗下藝人出寫真、影碟，甚至同其他單位合作，鋪天蓋地嘅宣傳攻勢，雖然此舉對速銷好有效，不過長遠嚟計，實力最緊要，事關水着妹要玩得耐，身材最重要，若然當事人日做夜做，好易捱到殘，咁大家都估到後果會喺點。我嘅做法取向低調兼走另類路線，譬如嗰期潮流興古銅色，我會保持白滑，雖然唔跟風好易被淘汰，但另類反而更突出，不過講到底都好需要觀眾緣，呢一點我同佐藤里香妹就肯定有啦，否則都唔可以捱咁耐！」哦，講咗咁耐原來都係觀眾緣最緊要！

多田亞沙美 Profile：

出生日期：1988年9月27日

三圍：36、24、34

身高：167cm

佐藤里香 Profile：

出生日期：1987年4月18日

三圍：33、24、33

身高：160cm

撰文：祖