小娟不明：「有幾好？」

肥然：「唔使考試自動升班喎！」

小娟：「你九成冇溫書啦！」

肥然：「都溫咗少少嘅，但如果學校有人感染豬流感，咁就成間學校都放假，連試都唔使考，就可以自動升班喎，你話幾好呢？」

小娟：「你咁唔想考試，你唔去機場打個轉，嗰度最多帶菌者，包保你可以即刻中招。」

肥然冇再出聲，於是兩人返學考試，考完試之後大家都留喺課室吹水，但小娟發現唔見咗肥然，阿花話：「佢考完試就話趕住去一個地方。」

小娟：「佢趕住去邊呀？」

阿花：「佢話趕住去機場！」

小娟一怔，將早上同肥然一番話告之阿花。

阿花同小娟都擔心肥然會做傻事，於是第二日，一早返學校等肥然，等到就嚟夠鐘，肥然戴住口罩返嚟，小娟問佢：「做乜咁遲？」

肥然話：「我中咗招。」

兩女嚇一跳，小娟再問佢：「真係去咗機場？」

肥然點頭，之後一拐一拐返入學校。

各位聰明嘅讀者，大家知唔知道肥然中咗乜嘢招呢？

1. 染咗豬流感

2. 中咗椰菜花

3. 隻腳拗咗柴

4. 踢波拉傷筋

答案：3. 隻腳拗咗柴

解釋：原來肥然考試時，竟然九成都識答，考完之後開心得滯一跳，竟然拗咗柴，隻腳痛到不得了，於是趕住去睇跌打，而肥然相熟嘅跌打醫師，就係喺九龍城舊機場對面，於是一放學就趕去機場，今日差啲遲到就係隻腳包住紗布，要一拐一拐咁行，千祈咪當佢受感染，拉佢去隔離呀！

小德