入巿半年獲利

先首問吓今年只有21歲嘅艾莉絲福特（Alexis Ford），佢話：「我入行嗰陣時係人都炒股票，但我啱啱入行，真係窮到燶，啲師姐叫我買呢隻買嗰隻，我只能夠聽，點知一場股災，個巿跌到谷底，當時買股票嘅老友，個個變晒大閘蟹。」

咁家陣你又咁夠膽入巿？艾莉絲話：「我做咗幾年嘢，身邊有啲錢，買屋又未夠，梗係攞嚟投資股票啦，而且我覺得家陣係入巿嘅好時機，因為好多股票都跌到低點，係時候趁低吸納，而且一反彈，可能連升好幾個價位，隨時有幾倍嘅利潤。」但喺家陣嘅經濟仲未復甦，唔怕再一場風暴，輸晒啲錢咩？艾莉絲話：「呢層我真係唔驚，頭先都講過，我身邊有多餘錢，但數目唔多，留喺銀行一年都冇十蚊息，攞晒出嚟投資，反而賺到唔少，我計過投資咗半年時間左右，賺咗70%利潤。」

有多餘錢至玩

點解咁厲害嘅？艾莉絲話：「其實買股票，最緊要係低買高賣，我好多貨都係最低嘅時候入，只要佢哋一有反彈，要升三四成真係濕濕碎，當然，仲要留心股票行情同埋相關嘅消息，所以就算開工，我都帶住手提電腦，隨時𥄫住最新消息情報。」以你嘅投資心得，有乜嘢可以教吓大家呢？艾莉絲話：「有多餘錢至好玩，如果啲錢係有好緊要嘅用途或者係問人借返嚟嘅，咁就唔好，另外我雖然話係玩，但玩都玩得專業啲，起碼要學股票嘅基本常識，唔好乜都唔識，否則多多錢都唔夠輸呀！」

真係金石良言。至於另一位靚女瑪姬蒂貝倫勞夏（Marketa Belonoha），佢今年27歲，原來已經有六年嘅投資經驗，而且獨具慧眼，喺今次風暴中，仲一啲損失都冇，點解咁好嘢呢？瑪姬蒂話：「呢啲咪係經驗囉！呢六年股海浮沉，幫咗我唔少。」

投資當做打工

咪以為瑪姬蒂咁叻，原來佢都曾經損失慘重，話說佢當年誤信消息，買咗隻科網股，點知泡沬一爆破，多年嘅積蓄毀於一旦，瑪姬蒂並唔甘心，於是一邊努力工作，一邊鑽研炒股秘笈，然後小注小注咁投資，經過多年嘅努力，先至做出驕人成績。

瑪姬蒂話：「有人問我係個乜嘢類型嘅投資者，我可以話係一個專家型，因為我買嘅股票，全部都做過深入嘅調查，而且就算買咗之後，都一直留意住公司有乜風吹草動，第一時間增持或者沽售，風暴前就預計到唔對路，將所有股票放晒套現。」

最後有啲乜嘢心得教吓大家呢？瑪姬蒂話：「我覺得投資者應該把投資視為一份工作，除咗要留意價格，仲要留意埋該公司身邊嘅大小消息，等你有更好嘅選擇，就算賺唔到大錢，都唔會搞到損失慘重。」果然係至理名言，睇嚟做埋財經專家都得喎。

艾莉絲福特（Alexis Ford）小檔案

年齡：21歲

身高：5呎6吋

三圍：34、24、33

興趣：投資股票

瑪姬蒂貝倫勞夏（Marketa Belonoha）小檔案

年齡：27歲

身高：5呎6吋

三圍：34、24、34

興趣：買賣證券

撰文：小德