東南亞地區唔少國家都有好多習俗，好似係泰國咁，大家認為嘅白色都係唔吉利，中國人就要紅當當先係好意頭，但係對於泰國人嚟講白色係代表好運。至於喺泰國人眼中，拜神係一件易事，因為佢哋只要信嗰件物件會為佢哋帶嚟好運的話，都照拜可也。
記得約七年前碧咸喺皇馬期間訪問泰國，仲同當地人踢友誼賽，之後當地人就整咗個碧咸像嚟拜，至於係乜嘢人拜，大家又唔好以為係踢波嘅人喎，反而係夜場中人，因為當年碧咸訪泰期間，當地夜場生意好到不得了，所以夜場嘅人都會視佢為吉祥人物。呢個星期刮王去過一間場，成班小姐就着起花蝴蝶裝嚟跳舞，而且仲一連跳咗一星期，但係每次跳舞時候都唔會招呼客人，刮王同經理傾過，佢話原來蝴蝶對於當地人嚟講係吉祥代表，所以當想求福嘅時候，佢哋都會跳吓呢一類蝴蝶舞。刮王當然覺得無厘頭，因為呢排有咁多流感，所以場嘅生意先受影響，咁又關蝴蝶乜事呢。雖然係咁講，但係一個星期之後再去呢間場睇，你真係吹佢唔脹，因為生意真係好咗好多，咁你話跳舞係唔係真係有用呢？
刮王