照顧細路

原來兩個囡囡都係有心之人，平時除咗忙住日常嘅工作之外，佢哋仲會周不時抽出寶貴嘅時間嚟做義工，幫助社會上有需要嘅人，呢兩位咁有愛心嘅囡囡，分別就係河野麻奈同埋杉本有美，兩個都係靚女中嘅靚女，可能同佢哋做得善事多有關係。

今年19歲嘅河野麻奈，佢原來喺讀書嘅時候，就已經開始做義工，河野話：「我記得第一次做義工，係叫做觀賞小老師嘅活動，當時我哋兩個同學，帶住十個幼稚園嘅小朋友去商場參觀，教佢哋點樣用扶手電梯、買嘢食同埋去洗手間。」

河野繼續：「我記得啲小朋友起初嚟到商場，由於環境有啲陌生，所以個個都好乖，一個個手拉住手嚟行。但玩咗一陣之後，佢哋熟咗環境，就開始作反，有幾個男仔仲喺男廁玩水，最後要我衝入男廁捉番晒佢哋出嚟，家陣諗起都有啲尷尬。」

為靚仔做義工

咁之後一直都係做照顧小朋友嘅義工嗎？河野話：「試過一次就怕怕，之後比較多參加探訪嘅工作，例如探訪老人院同醫院，由於出席嘅義工人數多好多，可以同佢哋玩吓遊戲或者才藝演出，而我就經常畀人安排負責唱歌同埋主持嘅工作。」難怪河野每次做訪問都講得有紋有路，河野笑笑口話：「參與義務工作，真係學到好多嘢，例如自己嘅溝通技巧同膽量，都係做義工磨練出嚟。」咁出嚟做嘢之後，仲有冇做義工呢？河野話：「當然有，只要時間許可，我一定會繼續做落去。」

至於另一個咁有善心嘅靚女，就係今年20歲嘅杉本有美，佢做義工原來有段古。杉本話：「讀緊高中一年級嘅時候，學校有個義工小組，負責嘅前輩十分靚仔，於是吸引大把女同學參加。我本來對做義工冇乜興趣，但我個好姊妹為咗近水樓台，於是拉埋我一齊參加做義工。」

相擁大哭

杉本繼續：「我第一次係去幫獨居老人打掃屋企，我要幫嘅係一個老婆婆，佢起初唔理我哋，後嚟見我哋忙咗成日之後，佢主動請我哋飲茶同埋食點心，之後仲拉住我嚟傾偈，佢講講吓以前嘅事，突然講到喊咗出嚟，之後我哋仲抱住大喊咗一場。」

場面咁感人師兄一定讚不絕口啦？杉本話：「我都以為係咁，點知返到去畀佢鬧咗一輪，原來同受惠者傾偈無問題，令對方抒發情緒都冇錯，但之後齊齊抱住喊就大錯特錯。應該當佢情緒開始波動時，就要提供正面嘅訊息，令佢思想保持正面。」之後杉本努力進修一啲義工技巧，加上咁多年嘅經驗，已經成為最年輕嘅資深義工，問佢咁忙點解仲要做義工呢？佢話：「做義工可以幫到人，實在太有意義，唔捨得唔做落去！」兩個囡囡咁有愛心，正所謂好心有好報，將來兩個想唔好都幾難。

河野麻奈小檔案

出生日期：1990年5月4日

身　　高：171cm

三　　圍：36、22、34

血　　型：B

興　　趣：幫助別人

杉本有美小檔案

出生日期：1989年4月1日

身　　高：167cm

三　　圍：33、23、34

血　　型：A

興　　趣：參加義工

撰文：小德