排隊做風俗娘
十年嚟日本經濟都冇乜好過，再遇上全球金融風暴，日本嘅經濟更加雪上加霜，失業率長期高企，除咗男人失業冇工開之外，最近連女性亦遭殃，零售同服務業相繼萎縮，大把女性加入失業大軍，而有部分女性嘅唯一出路，就係投身風俗行業。
據一間風俗店嘅老總井川先生講：「我哋全國有十幾間風俗店，早晚兩更加埋，大約需要四百個囡囡。但一直以嚟，我哋只招聘到預期嘅一半人左右，永遠都唔夠人，但最近一年，我哋招聘到嘅全職囡囡總數目，就已經多達六百多人。」
咁咪超晒標？井川話：「我同老闆都唔想，但你知唔知道呢一年總共有幾多人嚟見工？足足三千幾人，我要請多五個助手嚟應付佢哋，本來收到預期嘅四百人就夠，但冇嘢撈嘅人實在太多，於是老闆再多招二百人，但都係滿足唔到求職者嘅需要。」
求職要過三關
其他風俗店嘅情況都一樣嗎？井川話：「其他風俗店都一樣，我哋主力做人妻服務，所以向來搵囡囡都比較易，但一啲以年輕囡囡為賣點嘅風俗店，以前長期好難招到年輕囡囡，但近呢一年，一樣大把人排住隊去見工，間間店都可以請到人。」
搵工嘅人多，你哋甄選又會唔會嚴格好多呢？井川話：「呢層當然，我哋面試要過三關，第一次面試，由職員負責，主要問吓佢嘅情況，同解釋吓公司嘅運作，呢度大約踢走六成人以上，所以留低可以進行第二次面試嘅，都係精選高質嘅囡囡。」
咁第二次面試又係點呢？井川話：「第二次就係由我嚟把關，一般都係講點樣服務客人，有時仲要囡囡即場全裸，睇吓副架生，如果滿意嘅就會交畀老闆過目，而我大約再踢走六成人，剩低嘅都係靚女，本來我都幾難落手，惟有用壓價呢一招。」
壓價情況嚴重
井川話：「起初只減一啲福利，例如宿舍、交通費、飯錢、服裝化妝津貼等，本來都攔到一啲囡囡，後來都擋唔住，於是就減薪，呢招一出，都攔咗一段時間，但最後佢哋都妥協，最後連一啲特別服務嘅佣金都減埋，但都一樣大把人爭住做。」
咁家陣啲風俗店咪全部都係靚女？井川話：「一啲有實力同有知名度嘅風俗店，真係大把靚囡囡喺手，姿色稍差嘅都唔會冇出路嘅，因為全國風俗店咁多，總有一啲會收容佢哋。但係壓價嘅情況，一定會更嚴重，囡囡嘅收入會變相減少好多。」井川總結：「巿道唔好，見到好多有家要養嘅囡囡，我哋都會收留佢哋，雖然壓咗啲價，但只要勤勤力力，收入都十分可觀。而且老闆都會減價嚟吸引更多客人，等大家都有着數，齊齊共渡時艱。」咁有遠見，本地嘅官員真係要學吓人哋呀！
撰文：小德