老友河哥自從拍拖之後，就要交出旅遊證件，24小時報到，更禁絕同豬朋狗友來往，一直過住囚犯般生活，想當年河哥帶住我哋南征北討，真係何等英雄氣慨，可惜一切俱往矣。但前排見到河哥容光煥發，難道甩咗件麻煩女友重獲自由？
河哥話：「我識咗呢個女朋友之後，足足三年未去過內地，一來冇證件，二來女朋友唔鍾意上去玩，所以無法越雷池半步。好彩近半年，女友嘅娘親跟班師奶返上深圳玩過水療之後，返嚟大叫抵玩，使幾百蚊玩成日，又食、又浸、又瞓，又按摩。我女友畀佢阿娘游說底下，終於破例發還一次性回鄉證，即係去完又要畀番佢Keep，但係有得返深圳，我不知幾咁興奮，於是跟女朋友同大班師奶返上去，女友娘親仲好醒咁話，阿女你放心，呢度按摩好正經㗎，阿河冇得亂嚟。」
河哥外母真係識得講笑，冇嘢搞會唔會好冇癮呀？河哥話：「雖然冇得即場曳曳，但外邊大把佳麗等緊我，於是一場精密部署嘅逃亡計劃，就喺腦海中即時閃咗出嚟，我陪咗佢哋去過兩次之後，我就明白晒水療場嘅運作，於是第三次上去……」
可以成功逃亡嗎？河哥一笑：「我哋通常六七點至過去，所以一定會玩通宵，水療場嘅休息區，係分開男女賓嘅，所以大家玩到攰去瞓嘅時候，就係我最自由嘅時間，而呢間水療場平時係唔畀客人離開嘅，但如果同經理熟咗，咁就可能有辦法。」
河哥話：「我經過三次幫襯，同夜班經理熟咗，當女友去晒休息，我就同經理講想出去一下，經理亦好識做，只要喺大堂放低匙牌，登記咗就可以出去，一出去即刻去搵囡囡，盡興之後，有時間食埋個消夜，再返水療場瞓覺。」
河哥笑笑口話：「第二朝瞓醒齊齊埋單走人，真係神不知鬼不覺，女友娘親同啲師奶仲猛讚我乖仔，女友同佢娘親不知幾咁開心，仲話個個星期都嚟玩，但最開心嘅其實係我，因為有機會偷食，呢鋪仲唔發達。」難怪河哥咁神采飛揚，辛苦啲都值得嘅。
小德