以為冇運行
呢兩個靚女，分別係今年23歲嘅西館沙織，同埋22歲嘅松井繪里奈。睇佢哋嘅身材，真係一啲都唔顯眼，但樣子十分純品可愛，典型日本萌系美少女嘅味道，但日本一街啲女仔都係咁嘅款，佢哋點樣可以喺娛樂圈突圍而出呢？原來係有秘密武器。
原來佢哋把聲十分嬌嗲，同佢哋傾偈，真係好易暈晒大浪，難怪可以迷倒咁多男仔啦！佢哋有把咁誘惑嘅聲音，究竟開唔開心呢？沙織話：「人哋把聲天生就係咁嗲，以前返學仲成日畀啲男同學笑我，我以為有一把咁嗲嘅聲，會為我帶嚟不幸。」
點會呀？啲男生幼稚得滯唔識寶啫！沙織一笑：「我細個都唔識，仲以為以後都冇男仔會喜歡我，仲唔開心咗幾年，點知讀到高中，就係因為我把聲夠嗲，吸引好多男生走嚟追求我，仲畀全校男生力捧我成為兩屆校花選舉嘅冠軍添！」
欠缺說服力
除咗畀人追求多咗，有把咁嬌嗲嘅聲，仲有乜嘢好處呢？沙織話：「當然有，去買嘢講價就最好用！只要老闆係男人，通常都可以氹到對方打折頭畀我，年中真係慳唔少錢。去日式飯店食嘢，只要嗲老闆或者廚師兩句，碗麵都會大碗啲。」
人點都會老，當有朝一日靠嗲唔掂嘅時候，你又會點算呢？沙織話：「咁人哋又唔係只得把聲，我做嘢勤力通行都知，而且我會努力學習，多啲充實自己，成為一個多才多藝嘅藝人。」小小年紀就已經咁識得諗，沙織嘅前途真係無可限量。
至於繪里奈對自己把聲又滿唔滿意呢？繪里奈話：「好多人都好喜歡我把聲，但其實我就唔係咁鍾意，特別我哋做藝人，將來可能接拍唔同嘅片種，如果咁啱要做一啲惡人或者警察嘅角色，我把聲一啲說服力都冇，認真唔掂。」
向男友發功
咁有冇諗過辦法改改佢呢？繪里奈話：「有位前輩教我講嘢時可以慢慢講，同埋可以壓低啲聲音，我試過都幾有效，但係目前唔會咁樣講嘢，除非要拍戲。如果現實生活中都刻意咁做，我會覺得好辛苦，而且啲朋友同埋Fans聽到會未必接受到。」
沙織有把咁嗲嘅聲，買嘢攞晒着數，咁繪里奈又有乜嘢着數呢？繪里奈話：「我同男朋友鬧交或者爭論一啲嘢，通常都係我贏晒，一來我講嘢都幾犀利，二來真係唔夠講嘅，我就會用嗲功，男朋友通常都會投降，最後都係聽晒我嘅話。」
咁如果同男朋友親熱，當情慾最高漲嘅時候，你嘅叫聲會唔會一樣咁嬌嗲呢？繪里奈笑笑口話：「想知道答案，做到我嘅男朋友咪知道囉！」把口咁識講嘢，難怪你呢期咁紅，所以話成功嘅藝人，真係要多才多藝，獨孤一味，好快就玩完㗎啦！
撰文：小德