本文重點
小娟今日上堂嘅時候冇乜心機咁樣，成堂都掛住望出窗，史Sir見狀，想約小娟放學後傾吓偈，點知小娟話放學後約咗人，史Sir無奈惟有等第二日再同小娟做輔導，於是放學各自離開。之後，史Sir竟喺某快餐店遇上小娟，咁啱更坐喺佢嘅後面。
小娟同小花飲緊手中嘅汽水，小花問：「你約我出嚟做乜呀？」小娟：「我有啲嘢唔明想問吓你？」小花：「頭先史Sir叫你有嘢就同佢講，你又唔同佢講？」小娟低頭：「有啲嘢唔好意思同其他人講嘛！」鄰座史Sir邊聽邊縮低頭，以免被兩人認出。
小花：「咁你想問乜嘢呀？」小娟靠向小花說：「你有冇發覺，呢排好濕呀？」小花聽唔明：「乜嘢好濕呀？」小娟：「有啲地方好濕，我嗰度仲搞到連地下都濕埋！」小花雙眼一瞪：「乜你又係，我嗰度都係咁呀！多到抹極都仲有。」史Sir一聽，即時愕然，一緊張，將杯內汽水由飲管射出，小娟：「我媽話咁濕係唔正常喎！」小花：「我媽就話係正常喎！」小娟：「原來你都唔識，早知頭先就問史Sir啦！話唔定佢有辦法可以乾爽啲，唔使家陣一地都係！」
各位聰明嘅讀者，大家又知唔知道，小娟同小花喺度講緊乜嘢呢？
1. 講緊天氣潮濕
2. 講緊下體濡濕
3. 講緊男人鹹濕
4. 講緊煲湯袪濕
答案：1. 講緊天氣潮濕
解釋：小娟因為天氣回南，所以成間屋嘅牆身都出晒水，潮濕嘅時候連地都濕晒，所以心裏好煩，娟媽就話天氣唔正常，於是小娟請教小花，點知小花屋企亦一樣濕晒，但小花娘親就話係正常嘅，搞到小娟唔知點好，至於史Sir點解聽到咁激動，咁就要問佢至知啦。
小德