喺九型人之中，四號仔女最予人飄忽無定嘅感覺，佢哋屬於天生浪漫及個人主義者，感覺敏銳，相信自己嘅直覺。佢哋擁有藝術家嘅氣質，喜愛自我陶醉及藉表現去凸顯自己與眾不同，嚴重者更會有自戀傾向。呢種型格嘅人不甘平凡，絕對唔會願意過着平淡刻版嘅生活，所以經常會做出一啲出人意表嘅事，藉以為自己留下特別嘅經歷。
至於床上表現方面，四號仔女善於營造浪漫氣氛，每一個步驟都充滿驚喜，有佢哋做對手，真係唔使擔心會悶親㗎！唔講唔知，佢哋有一個騎呢習慣，就係零舍鍾意酒後作賽，認為飲到醉醺醺咁玩先夠興奮。佢哋大多認為受到酒精影響之後，意識進入模糊狀態，玩起嚟就會有一種似是而非嘅感覺，比起清醒狀態所獲得嘅感覺更強烈，覺得更為過癮。同時佢哋亦喜愛喺交戰期間，幻想自己係電影中嘅主角，甚至將眼前人幻想成其他對手。聽落似乎對另一半好唔公平，但呢啲只係佢哋心裏面嘅感覺，唔講就冇人知啦！
作為四號仔女嘅對手，喺交歡之前，不妨預先準備一支佢哋喜愛嘅靚酒，好似紅酒、威士忌等，配合一個浪漫又舒服嘅環境，相信男女雙方都能更易投入性事之中。不過選擇酒類時，切忌隊啤酒，事關飲到成肚氣，交戰時就會相當辛苦喇！
娟娟