自從皇崗推行24小時通關以後，對於蒲友嚟講確實方便得多，但隨着大家愈玩愈遠，甚至想過東莞玩，又已經夜深冇車時，就惟有捱貴的士。據了解，由深圳坐的士去東莞，車費起碼二、三百蚊人仔，如果每個星期都去一次，條數真係幾襟計。有見及此，有人就會搵埋幾個朋友一齊北上，一來中途有個照應，二來可以分擔車資。
搵埋朋友北上，確實係一個好方法，但有時未必個個都可以就啱時間，咁仲會唔會有其他方法？據熟悉夜場行程嘅黃先生表示，現時有人會網上招募同路人。黃先生話：「有留意網上論壇嘅朋友，相信都會見過一啲北上討論區，除咗畀大家分享尋歡嘅心得及賽後報告，仲會有人藉以找尋北行同伴，搞手會喺網上列出日期、時間、等候及目的地，有興趣人士可以留口訊或E-mail。以我所知，呢個約埋一齊北上嘅情況愈嚟愈普遍，事關好多人都認為，反正大家嘅目的地相同，一大班人起行就唔使獨力承擔過百蚊嘅車資，而且仲可以喺途中交流一下心得，又或者從中識番個朋友。」
雖然呢個方法的確為蒲友慳番唔少，但同行始終係陌生人，唔怕有危險？黃先生就話：「安全的確係一個問題，但好多蒲友都會認為，大家都係香港人，既然一齊上去玩，又點會呃嗰幾十蚊車費？反而比較擔心的士司機會唔會係劫匪多啲。」最後，黃先生補充一點，就係大家約埋一齊北上時，最好係過咗關先至去搵的士，如果當中有人話已經預先安排咗的士或白牌車，咁大家就要諗清楚，事關好可能會係屈錢黨，待上車先勒索，所以，大家無論幾時都絕不能掉以輕心！
娟娟